Estatuts de l’A.I.E.O.

Estatuts

Títol I – Denominacion, domiciliacion, finalitats

Article 1

Fondada en 1981, l’Associacion internacionala d’estudis occitans (A.I.E.O.) es un organisme scientific internacional, organizat segon la legislacion francesa en vigor (lei del 1èr de julhet de 1901). Constituís un luòc de rencontre e de collaboracion per tal de promòure e coordinar los estudis occitans dins l’ensemble de las disciplinas de las sciéncias umanas e socialas. Recampa e assòcia, fòra de tota doctrina o tendéncia, los cercaires concernits a travèrs lo mond entièr, que sián medievalistas o modernistas, lingüistas, filològs, literaris, istorians, musicològs, antropològs o sociològs, que considèren los problèmas de la lenga e de la literatura d’òc en se o dins lors rapòrts amb lor environament cultural e social. Sa durada es illimitada.

Article 2

Lo sèti de l’associacion se tròba al domicili del president, los servicis tecnics essent domiciliats a çò del secretari.

Article 3

La tòca de l’associacion es de recampar de personas fisicas que s’interèssan a la matèria occitana e d’encoratjar e sostenir tota activitat scientifica en aquel domeni. Aquò implica sustot que l’A.I.E.O. aura vocacion a :

difusar d’entresenhas sus las recèrcas realizadas e en cors dins lo domeni dels estudis occitans, los ensenhaments organizats dins las universitats, los collòquis, etc;
organizar, segon los besonhs que s’exprimiràn e los mejans que poirà obtenir, de rencontres scientifics, collòquis e acamps de trabalh podent regropar, a l’entorn d’un tèma determinat, los membres de l’associacion e totes los que se sentiràn concernits pel subjècte;
organizar periodicament (cada tres ans) un grand congrès internacional permetent una confrontacion generala dels membres de l’associacion e dels cercaires non membres trabalhant sul domeni occitan;
ajudar, per la mobilizacion dels mejans materials, morals e financièrs que ne dispausa, a la publicacion d’obratges scientifics pertocant lo domeni occitan.

Títol II – Composicion, ressorsas

Article 4

L’Associacion es compausada

dels ensenhaires universitaris;
dels cercaires dels organismes de recèrca en domeni occitan, originaris o domiciliats en totes païses;
dels estudiants avançats menant de recèrcas;
de las personas presentant una candidatura argumentada al conselh d’administracion;
de las personas moralas (institucions, equipas, laboratòris, associacions) que pòdon aderir coma organismes. Son representats pendent l’AG per una sola persona que causisson, renovelabla a lor convenéncia mas identificada cada annada pendent lo renovelament de la cotizacion.

Tota candidatura es somesa a l’aprobacion del CA que la presenta a l’amassada generala en justificant sa decision de l’admetre o non.

Article 5

Son membres actius las personas admesas en foncion de l’article 4 e avent aquitat lor cotizacion annala. Los membres pagan la cotizacion annala e an eles sols lo drech de participar als vòtes pendent l’amassada generala e d’i intervenir. Recebon las circularas e autras publicacions ordinàrias de l’associacion.
L’associacion pòt elegir membre d’onor de personas que, membres o non de l’A.I.E.O., an de meritis particulars per l’estudi del domeni occitan. Las proposicions de nominacion devon arribar al conselh d’administracion almens quaranta uèch oras abans l’amassada generala. La causida dels membres d’onor es lo fach del conselh d’administracion, puèi es somesa a l’aprobacion de l’amassada generala ; la majoritat absoluda dels presents es requerida. L’amassada generala pòt pas elegir que dos membres d’onor a l’encòp.
Los membres de l’associacion pòdon demissionar a cada moment après s’èsser aquitats de las cotizacions degudas, per letra o corrièr electronic adreçat al secretari, fasent l’objècte d’un acusat de recepcion.

Article 6

La qualitat de membre se pèrd per:

decès,
demission,
radiacion prononciada pel conselh d’administracion per non pagament de la cotizacion,
radiacion per tota accion susceptibla de nòser als interèsses de l’associacion, prononciada per l’amassada generala sus proposicion del conselh d’administracion, après aver pres coneissença de las informacions e arguments presentats per l’interessat.

Article 7

Las ressorsas de l’associacion comprenon:

lo montant de las cotizacions. La cotizacion annala dels membres individuals es fixada annalament pel conselh d’administracion. La cotizacion dels cercaires joves es fixada a la mitat de la cotizacion de basa;
las subvencions dels Estats, de las comunas, departaments, regions e de tot autre organisme public o privat de totas nacionalitats, organismes comunautaris, etc.;
aital coma de divèrses dons, legats e donacions que l’A.I.E.O. ne poiriá beneficiar.

Títol III – Administracion

Article 8

L’associacion es administrada per un conselh d’administracion (CA) compausat de dètz e sèt (17) membres : un president, tres vicepresidents, un secretari, un clavaire, onze assessors dont tres representants dels cercaires joves. Totes los membres del conselh son elegits per l’amassada generala. La durada dels mandats es de sièis ans, renovelable un còp, levat pels « joves cercaires » elegits per tres ans. Lo conselh es aital renovelat parcialament per mitat cada tres ans.
Sièis meses abans l’acamp de l’amassada generala (AG) programat de costuma dins l’encastre del congrès tercenal de l’associacion, lo conselh d’administracion anóncia los mandats renovelables e convida los membres a prepausar de candidats o a se declarar candidats dins los tres meses. Las proposicions son transmesas al president o al secretariat ; per èsser receptiblas, devon èsser acompanhadas d’un acòrdi escrich del candidat prepausat estipulant qu’acceptarà lo mandat. Cada membre se pòt portar dirèctament candidat. Tres meses abans l’acamp de l’amassada generala, lo secretariat declara candidat totas las personas aital inscrichas. Amb la circulara que presenta la lista oficiala dels candidats, los membres a jorn de lor cotizacion recebon las informacions necessàrias per votar pendent l’AG o, en cas d’abséncia, per corrièr postal o electronic.
En cas de vacança imprevista, lo CA se carga de nomenar un membre coma remplaçant temporari, que son pòst serà degudament somés al vòte del congrès seguent.
Los membres del conselh son elegits a la majoritat relativa. Lor mandat comença sulcòp.
Lo conselh novèl causís demest sos membres, en sa primièra session e a l’escrutinh secrèt, un burèu compausat d’un president, tres vicepresidents, un secretari, un clavaire. Lo president es causit, de preferéncia, demest los membres de nacionalitat non francesa. Lo clavaire deu èsser de nacionalitat francesa. Lo burèu es elegit per tres ans.
L’amassada generala balha poder permanent al conselh d’administracion per totas las questions pertocant lo foncionament de l’associacion entre las amassadas e en particular per las adesions e demissions, per las activitats scientificas correntas, per las publicacions per l’organizacion dels collòquis e lor orientacion scientifica. Lo conselh informa l’amassada generala dins un rapòrt d’activitat qu’es somés a la discussion.
Lo president convòca e presidís los acamps del conselh d’administracion aital coma las amassadas generalas. Representa l’associacion a l’exterior. Engatja las despensas. Pasmens, sul plan juridic, deu agir en comun acòrdi amb lo secretari e lo clavaire, degudament mandatat pel conselh d’administracion. Estimula las activitats de l’associacion e pren d’iniciativas per n’espandir la portada. Pòt crear de comissions ad hoc, limitadas dins lo temps, per gerir de dossièrs especifics ; los membres d’aquelas comissions son designats pel conselh, en una quantitat restrencha non fixada ; apartenon indiferentament al conselh e/o son eissits de l’ensemble dels membres de l’A.I.E.O.
Lo secretari es lo centre d’informacion de l’associacion. Per totas las questions pertocant l’associacion, los membres s’adreçan al secretariat aital coma totas las personas o organismes que desiran contactar l’associacion. Lo secretari règla los afars corrents e agís amb l’acòrdi del president en tot afar particular. Es responsable de l’execucion de las decisions del conselh.
Lo clavaire recep las cotizacions e las autras ressorsas de l’associacion e règla las despensas engatjadas per l’associacion pel president.

Article 9

Lo Conselh d’Administracion se recampa un còp per an sus convocacion del president o, excepcionalament sus la demanda del quart de sos membres. Cada acamp del conselh deu èsser convocat per via electronica almens un mes a l’avança ; sas decisions an valor legala tanlèu qu’almens cinc de sos membres i assistisson, tres d’aqueles cinc membres essent membres del burèu. Es establit un verbal de las sessions signat pel president e pel secretari puèi comunicat per via electronica a l’ensemble dels membres del conselh qu’agèsson participat o pas a aquel acamp.
Lo conselh d’administracion es consultat un còp per an pel president per examinar las candidaturas d’adesion a l’associacion emanant de personas que respondon pas a las exigéncias formuladas dins lo primièr alinea de l’article 4 dels presents estatuts. Lo vejaire del conselh d’administracion es sulcòp comunicat pel president o pel secretari als candidats.

Article 10

Los membres de l’associacion pòdon pas recebre cap de remuneracion a causa de las cargas que lor son fisadas. Las personas que l’associacion poiriá emplegar pòdon èsser convidadas amb votz consultativa a las sessions de l’amassada generala e del conselh d’administracion.

Article 11

L’amassada generala ordinària s’amassa cada tres ans, de costuma pendent lo congrès tercenal de l’A.I.E.O. Es convocada pel president sièis meses a l’avança per una circulara electronica qu’indica l’òrdre del jorn provisòri. Son burèu es lo del conselh.
L’amassada generala delibèra sus l’òrdre del jorn. Ausís los rapòrts del president sus la gestion e la situacion morala, del clavaire sus la situacion financièra precisa e documentada de l’associacion (comptes de l’exercici claus de las tres annadas escorrudas). Après discussion, apròva aqueles rapòrts, vòta lo budgèt de l’exercici seguent, delibèra sus las questions inscrichas a l’òrdre del jorn, provesís al renovelament dels membres del conselh d’administracion. L’amassada generala pòt pas valablament deliberar que se lo quart almens dels membres de l’associacion es present o representat, cada membre present podent aver al maximum tres procuracions.

Article 12

Se fa besonh, o sus demanda d’un quart dels membres a jorn de lor cotizacion, lo president pòt convocar una amassada generala extraordinària segon las modalitats previstas a l’article 11.

Títol IV- Divèrs

Article 13

La lenga oficiala de l’associacion es l’occitan. Totas las lengas romanicas aital coma l’anglés pòdon èsser emplegadas pendent las comunicacions oralas (congrèsses). Tot autre cas (sustot dins l’encastre de publicacions) relèva de la competéncia del conselh d’administracion.

Article 14

Un collègi de joves cercaires fa partida de l’A.I.E.O. Los joves cercaires son los estudiants avançats condusent de recèrcas e los doctors avent sostengut lor tèsi dins las sièis annadas precedentas e qu’an pas de pòst fixe.
Tres representants del collègi dels cercaires joves fan partida del conselh d’administracion, elegits per tres ans non renovelables (cf. Article 8.1).
Los joves cercaires pòdon organizar de rencontres scientifics (jornadas d’estudis), jos l’egida del CA de l’A.I.E.O. Lo CA constituïrà lo comitat scientific d’aqueles rencontres.

Article 15

Lo conselh d’administracion aplica aqueles estatuts fins qu’una novèla amassada generala se pronóncie. Tota modificacion dels presents estatuts se pòt pas far que pendent una amassada generala. Dins la convocacion, signada pel president, deu figurar lo tèxt de la modificacion desirada. Per que la modificacion pòsca èsser aprovada, cal qu’una majoritat absoluda dels membres presents o representats (veire Article 11) aja participat al vòte. S’aquel quorum es pas atench, lo conselh d’administracion pòt organizar un vòte per correspondéncia.
Un règlament interior de l’associacion pòt èsser establit pel conselh d’administracion que, après discussion, ne fa aprovar lo contengut e la validitat per l’amassada generala. Aquel règlament eventual es destinat a fixar los punts divèrses non previstes pels estatuts, sustot los que pertòcan l’administracion intèrna d’associacion.
En prevision de l’organizacion de collòquis o congrèsses e sus totas menas de projèctes, lo conselh d’administracion pòt prene l’iniciativa de crear de comissions preparatòrias qu’agisson en ligam e acòrdi amb el.

Article 16

Las despensas son ordenadas pel president o per un membre del conselh delegat per el. Aquel membre deu èsser (coma lo clavaire) de nacionalitat francesa e representa l’associacion en justícia e dins la vida civila. Deu gaudir del plen exercici de sos dreches civics.

Article 17

Se las circonstàncias d’excepcion s’opausan a la realizacion d’un congrès e a la tenguda de l’amassada generala ordinària, una amassada generala virtuala poirà èsser convocada.
De circonstàncias imprevistas pòdon egalament menar lo CA a acorchar los delais de convocacion de l’amassada generala o excepcionala.

Article 18

Un quart dels membres actius pòt demandar la dissolucion de l’associacion. L’amassada generala decidís sus aquela proposicion que, per èsser adoptada, deu reculhir las voses dels dos tèrces dels membres actius de l’associacion. Se la dissolucion es decidida, un o mantun liquidateur es nomenat per l’amassada generala e l’actiu, s’i a luòc, es transferit a una autra associacion francesa o internacionala que perseguís d’objectius analògs a los de l’A.I.E.O., confòrmament a l’article 9 de la lei del 1èr de julhet de 1901 e al decret del 16 d’agost de 1901. La dissolucion deu far l’objècte d’una declaracion a la prefectura de Garona Nauta al près de la quala seràn depausats los presents estatuts renovats de l’A.I.E.O.