BURÈU JCDO
De 2023 a 2026
Secretària:
Caroline Calvet
Sossecretària:
Susanna Barsotti
Assessors:
Lés Cros-Humbert, Quentin Garnier, Vincent Surrel, Camilla Talfani
De 2019 a 2023
Secretari:
Fabio Barberini
Sossecretària:
Camilla Talfani
Assessors:
Marina Navàs, Cécile Noilhan, Maguelone Sauzet, Andrea Tondi
Estatuts dels Joves cercaires en domeni occitan (JCDO)
Títol I – Denominacion e finalitats
Article 1
Los Joves cercaires en domeni occitan (JCDO) son un collègi de cercaires en debuta de carrièra creat en 2019 e que foguèt oficialament admés a l’AIEO a comptar de l’Amassada generala que se tenguèt a l’escasença del XIIIen Congrès internacional de l’AIEO lo 17 de julhet 2021 (Estatuts de l’AIEO, Títol II, Article 14).
Article 2
La finalitat dels JCDO es de collaborar amb l’AIEO confòrmament als objectius de l’associacion declarats dins los estatuts de l’AIEO títol I, article 3. En particular, los JCDO son encargats de favorizar la difusion dels estudis occitans al près dels joves cercaires, e de velhar a l’actualizacion del site internet de l’AIEO pertocant l’actualizacion de las informacions bibliograficas (« ven de paréisser »), de las tèsis e dels projèctes en cors.
Títol II – Composicion e administracion
Article 3
Los JCDO son compausats d’estudiants de nivèl universitari condusent de recèrcas (memòri de Mastèr en cors), de doctorants, e de cercaires pòstdoctorants avent sostengut lor tèsi dins las sièis (6) annadas passadas e qu’an pas de pòst fixe a l’universitat.
Article 4
Son membres dels JCDO los cercaires admeses confòrmament a l’article 3 d’aqueles estatuts, e avent aquitat lor cotizacion annala al près de l’associacion, confòrmament a las disposicions de l’article 5 dels estatuts de l’AIEO. Lo restacament a la seccion JCDO per aqueles joves cercaires aderents a l’AIEO es automatic e gratuit. Los JCDO pòdon pas exigir cap de cotizacion complementària. Lo drech de participar al vòte pendent l’Amassada generala de la seccion JCDO, e d’i intervenir, es subordinat a la condicion d’èsser membre a jorn de sas cotizacions al près de l’AIEO.
Article 5
Los JCDO dispausan pas de ressorsas economicas distintas e independentas de las de l’AIEO. Dins la sola tòca d’organizar de rencontres scientifics, los JCDO pòdon demandar de subvencions a tot organisme o institucion publica o privada de totas nacionalitats, o organismes comunautaris, etc.
Article 6
6. 1. Los JCDO son administrats per un burèu compausat de sièis (6) membres: un (1) secretari, un (1) vicesecretari, (4) quatre assessors.
6. 2. Totes los membres del burèu dels JCDO son elegits per l’Amassada generala (AG) de l’AIEO. Los membres d’aquel burèu son elegits a la majoritat relativa. Lor mandat comença sulcòp.
6. 3. Lo secretari e lo vicesecretari siètan al Conselh d’administracion (CA). Son segondats per un dels assessors, causit pel burèu dels JCDO, que sietarà al CA el tanben. Aquelas tres personas d’aquí fan partida del CA de l’AIEO.
6. 4. La durada dels mandats es de tres (3) ans. Lo mandat del secretari e del vicesecretari es pas renovelable. Lo mandat dels assessors es renovelable solament un còp. Lo secretari e lo vicesecretari poiràn beneficiar d’un mandat d’assessor (dins lo limit cumulatiu de dos mandats en tot), sens poder pasmens sietar al CA coma assessor. Dins aquelas condicions, qual serà estat assessor sietant al CA poirà pas venir secretari o vicesecretari puèi, dins la mesura que serà pas mai autorizat a sietar al CA.
6. 5. En cas de vacança imprevista d’un sèti d’assessor dins lo burèu dels JCDO e non membre del CA, lo burèu dels JCDO se cargarà de nomenar un remplaçant temporari, que son pòst serà puèi somés al vòte de l’amassada generala seguenta de l’AIEO. Lo CA de l’AIEO serà informat oficialament per escrich pel secretari dels JCDO d’aquela demission e de la substitucion executada. Lo mandat del remplaçant, se deviá èsser elegit de biais regular amb los autres membres del burèu pendent l’amassada generala seguenta, seriá pas renovelable dins la mesura que constituïriá ja un segond mandat. Se la vacança de sèti tòca un membre admés dins lo CA de l’AIEO (secretari, vicesecretari, assessor delegat al CA), lo burèu dels JCDO causirà dins son sen un membre de substitucion, puèi n’informarà oficialament per escrich lo president e lo secretari de l’AIEO. Aquela informacion serà transmesa pel secretari dels JCDO, o, a defaut, son vicesecretari, se la vacança pòrta sul pòst de secretari. Lo president e lo secretari de l’AIEO devon donar lor acòrdi formal a aquela substitucion.
Article 7
7. 1. Sièis meses abans l’acamp de l’AG programat de costuma dins l’encastre del congrès tercenal de l’AIEO, lo secretari dels JCDO anóncia los mandats renovelables e convida totes los membres dels JCDO a prepausar de candidats o a se declarar candidats dins los dos meses. Las proposicions son transmesas al president e al secretariat de l’AIEO. Per èsser de bon recebre, las proposicions de candidatura devon respectar los critèris expausats dins los articles 3 e 4 d’aqueles estatuts e devon èsser acompanhadas d’un acòrdi escrich del candidat prepausat estipulant qu’acceptarà lo mandat. Cada membre dels JCDO, al sens de las condicions expausadas als articles 3, 4 e 6.3 d’aqueles estatuts, se pòt portar candidat.
7. 2. Quatre meses abans l’acamp de l’amassada generala, lo burèu dels JCDO es consultat pel president de l’AIEO per tal d’examinar las candidaturas al CA de l’AIEO. Lo vejaire del burèu dels JCDO e del president de l’AIEO es comunicat, jos tres jorns, pel secretari dels JCDO als candidats.
7. 3. Tres meses abans l’acamp de l’AG, lo secretariat de l’AIEO declara candidatas totas las personas aital inscrichas. Amb la circulara qu’establís la lista oficiala dels candidats, los membres a jorn de lor cotizacion recebon las informacions necessàrias per votar pendent l’AG o, en cas d’abséncia pendent l’AG, per corrièr postal o electronic.
Article 8
8. 1. Lo secretari dels JCDO convòca e presidís los acamps del burèu. Representa los JCDO a l’exterior. Deu agir en comun acòrdi amb lo president, lo secretari e lo clavaire de l’A.I.E.O. Estimula las activitats de l’associacion e, degudament autorizat pel president e lo CA de l’AIEO, pren d’iniciativas per n’espandir la portada. Es responsable de l’execucion de las decisions del burèu dels JCDO.
8. 2. Lo vicesecretari es lo centre d’informacion dels JCDO. Per totas las questions pertocant l’associacion, los membres dels JCDO se pòdon adreçar al vicesecretari. Tot parièr, totas las personas o organismes que desiran contactar los JCDO. Lo vicesecretari règla los afars corrents e agís amb l’acòrdi del secretari per tot afar particular.
8. 3. Los assessors ajudan lo secretari e lo vicesecretari dins l’exercici de las foncions reglamentadas pels articles 8.1 e 8.2 del present estatut.
Article 9
9. 1. Lo burèu dels JCDO s’amassa en session telematica dos còps per an sus convocacion del secretari. Cada acamp del burèu deu èsser convocat per via electronica almens un mes a l’avança; sas decisions son valablas tanlèu qu’almens quatre de sos membres i assistisson e i vòtan. Lo vicesecretari establís un verbal detalhat de las sessions signat pel secretari, puèi comunicat per via electronica a l’ensemble dels membres del burèu qu’an pas participat a aquel acamp, e al president de l’AIEO. Una procuracion dels absents balhada als presents es possibla, dins lo limit d’una procuracion per procuraire.
9. 2. Cada membre del burèu possedís una sola votz. En cas d’egalitat, lo punt deurà èsser renviat a l’acamp seguent; al segond torn de vòte, e se l’egalitat demòra, la votz del secretari dels JCDO compta doble.
Article 10
Los joves cercaires dels JCDO pòdon organizar de rencontres scientifics (jornadas d’estudis), jos l’egida del CA de l’AIEO. Lo CA constituïrà lo comitat scientific d’aqueles rencontres.
Títol III – Divèrs
Article 11
La lenga oficiala dels JCDO es l’occitan. Totas las lengas romanicas e l’anglés pòdon èsser emplegadas pendent las comunicacions oralas (sessions del burèu, jornadas d’estudis e congrèsses). Los escriches dels JCDO (verbals d’acamps, etc.) seràn redigits dins una lenga romanica.
Article 12
Tota modificacion dels presents estatuts se pòt pas far que pendent una amassada generala dels JCDO. Dins la convocacion, signada pel secretari, deu figurar lo tèxt de la modificacion desirada. Per que la modificacion pòsca èsser aprovada, cal qu’una majoritat absoluda dels membres dels JCDO presents o avent balhat procuracion aja participat al vòte. Una procuracion dels absents balhada als presents es possibla, dins lo limit d’una procuracion per procuraire. S’aquela majoritat es pas atencha, lo burèu deurà organizar un vòte per correspondéncia telematica.
Article 13
Estant que los JCDO son una seccion de membres actius de l’AIEO (veire article 4), per tot çò qu’apareis pas explicitament reglamentat dins aqueles estatuts, los estatuts generals de l’AIEO son valables. En cas de conflicte de règla, s’aplica l’estatut general de l’AIEO. Lo president de l’AIEO assistit de son secretari demòran las instàncias privilegiadas de dialòg dels JCDO. Lo president es abilitat a trencar los conflictes.