L’AIEO e son istòria

L’Associacion Internacionala d’Estudis Occitans (A.I.E.O.) a per objectiu de promòure e de coordinar la recèrca scientifica dins lo domeni dels estudis occitans. Sa mission es de recampar, sens cap de doctrina o tendéncia, totes los que se dedican a aquelas recèrcas dins lo mond entièr, que sián medievalistas o modernistas, lingüistas o literaris, istorians, antropològs, musicològs, etc., que considèren los problèmas de la lenga e de la literatura d’òc en se o dins lor relacion amb lor environament cultural e social. L’Associacion es un luòc de rescontre e de dialòg entre las disciplinas de totas las umanitats e las sciéncias socialas.

L’istòria de l’AIEO comencèt en 1981. Mas naturalament, foguèt precedida d’una preistòria. Dempuèi 1955, los cercaires del mond entièr que trabalhavan suls estudis occitans se reünissián informalament cada tres ans dins una vila occitana (Avinhon, Ais, Bordèu, Niça, Montpelhièr, Monteleimar, etc.) dins l’encastre del Congrès de lenga e de literatura d’òc e d’estudis franco-provençals. En 1981, aquel Congrès se tenguèt a Lièja, en Belgica, e se prenguèt aquel an d’aquí la decision de crear una associacion amb per tòca de promòure los estudis occitans dins totas las disciplinas de las sciéncias socialas e de las umanitats, en recampant a l’encòp d’universitaris trabalhant dins aquelas disciplinas e de non-universitaris qu’avián demostrat lor competéncia. Lo principi d’acamps regulars foguèt alara adoptat, que siá jos la forma de congrèsses tercenals (nòu entre 1984 e 2008) o de collòquis intermediaris o jornadas d’estudi sus de questions especificas (nòu dempuèi 1983). Foguèt tanben adoptat lo principi d’una colleccion de publicacions scientificas, de tèsis o d’edicions de tèxtes occitans.

L’Associacion a, d’autre caire, publicat mantun bulletin, 14 fins ara, dedicats siá a far lo bilanç d’un camp particular de recèrcas (sociolingüistica, literatura medievala, literatura occitana en general, etc.), siá a presentar la bibliografia scientifica dels aderents de l’associacion. Los congrèsses tercenals se debanan a l’estiu, siá dins una vila occitana, siá dins una vila universitària estrangièira. Dempuèi que l’A.I.E.O. foguèt fondada en 1981, de congrèsses son estat organizats a :

(Per las informacions bibliograficas de totes los congrèsses levats lo d’Albi e de Lhèida, vejatz Bibliografia del site vièlh).

Las activitats de l’A.I.E.O. se debanan a l’ora d’ara dins tres direccions :

• l’organizacion de rescontres scientifics, de reünions de trabalh e, en particular, dempuèi 1984, cada tres ans, un grand Congrès internacional.
• la publicacion d’òbras scientificas a prepaus dels estudis occitans
• la collècta e la difusion d’informacions sus las recèrcas acabadas o en cors dins lo domeni dels estudis occitans.

L’Associacion es dirigida per un Conselh d’Administracion elegit per l’Assemblada Generala que claus cada congrès tercenal. Dempuèi 1981, l’A.I.E.O. foguèt presidida successivament pel Prof. Peter Ricketts (Reialme-Unit, 1981-1990), lo Prof. Q.I.M. Mok, (Païses-Basses, 1990-1993), lo Prof. Georg Kremnitz (Àustria, 1993-2005), lo Prof. Walter Meliga (Itàlia, 2005-2014), la Prof. Rosa Mª Medina Granda (Espanha, 2014-2023).

Es actualament presidida per la Professora Miriam Cabré (Universitat de Girona, Catalonha).